ចូរស្រលាញ់ខ្លួនឯងឲ្យច្រើនៗ ៧ចំណុចនេះបង្ហាញថាអ្នកកំពុងតែបំផ្លាញខ្លួនឯងហើយ
នៅពេលខ្លះអ្នកប្រាកដជាមានអារម្មណ៍ថាមិនមានកម្លាំងធ្វើអ្វីសោះ សូម្បីតែងើបចេញពីគ្រែគេង។ អ្នកអាចនឹងមានអារម្មណ៍ថាអស់សង្ឃឹម គ្មានឆន្ទះក្នុងការធ្វើការងារប្រចាំថ្ងៃដដែលៗទាំងអស់នោះទេ។ កុំបារម្មណ៍! ព្រោះនេះជារឿងធម្មតាទេប្រសិនជាអ្នកមានអារម្មណ៍បែបនេះម្តងម្កាល ប៉ុន្តែប្រសិនបើការគិតបែបនេះកើតមានឡើងជារៀងរាល់ថ្ងៃ គ្មានពេលស្រាកស្រាន្ត នោះអ្នកអាចនឹងកំពុងប្រឈមនឹងការបំផ្លាញខ្លួនឯងហើយ។ នេះគឺជា៧ចំណុចសំខាន់ៗដែលបង្ហាញថាអ្នកកំពុងបំផ្លាញខ្លួនឯងដោយប្រយោល៖
១. អ្នកតឹងរឹងចំពោះខ្លួនឯងពេក
តើអ្នកជាមនុស្សដែលចូលចិត្តមើលស្រាលខ្លួនឯង គិតថាខ្លួនឯងមិនល្អ ហើយភាគច្រើនមើលឃើញតែកំហុសខ្លួនឯងមែនទេ? ប្រសិនបើមែន អ្នកគួរកាត់បន្ថយទម្លាប់នេះចេញ ហើយចាប់ផ្តើមចាត់ទុកខ្លួនអ្នកដូចជាមិត្តល្អម្នាក់ ដោយប្រើប្រាស់នូវពាក្យពេជន៍សមរម្យ លើកទឹកចិត្តខ្លួនឯងនិងបើកចិត្តឲ្យទូលាយ។
២. ចាំចាប់តែកំហុស
អ្នកតែងតែគិតបែបទុទិដ្ធិនិយមចំពោះរាល់កំហុសដែលអ្នកបានសាង ដែលនាំឲ្យអ្នកគិតថាខ្លួនឯងជាមនុស្សដែលគ្មានប្រយោជន៍ ធ្វើអ្វីក៏មិនដែលត្រូវ ហើយការគិតបែបអវិជ្ជមាននេះអាចនាំទៅរកជម្ងឺបាក់ទឹកចិត្តថែមទៀតផង។
៣. ពន្យាពេលជារឿយៗ
អ្នកមានកិច្ចការជាច្រើនដែលត្រូវបំពេញ ប៉ុន្តែអ្នកមិនចង់ធ្វើការងារទាំងនោះទេ ហើយចាំទាល់តែដល់ពេលកំណត់តែម្តង ទើបស្រវ៉េស្រវ៉ាចាប់ផ្តើមធ្វើ។ នេះក៏ជាសញ្ញាមួយដែលអ្នកកំពុងធ្វើបានខ្លួនឯងផងដែរ។
៤. គ្មានរបៀបរៀបរយ
អ្នកមិនខ្ចីរៀបចំខ្លួនសូម្បីតែងូតទឹក ដុសធ្មេញ ហើយអ្នកធ្វើការទាំងអារម្មណ៍មិនមូល ភ្លេចមុខ ភ្លេចក្រោយ យឺតយ៉ាវនិងធ្វើការងារខ្ជះខ្ជាយឲ្យតែរួចពីដៃជាដើម។
៥. គិតថាខ្លួនឯងគ្មានតម្លៃ
នៅពេលដែលមានរឿងក្នុងចិត្ត អ្នកតែងតែលាក់លៀម មិននិយាយចេញមកក្រៅឲ្យគេដឹងព្រោះអ្នកគិតថាខ្លួនឯងរអ៊ូច្រើន ឥតប្រយោជន៍ គ្មាននរណាចង់ស្តាប់នោះទេ។
៦. អំណាចរបស់អ្នកដ៏ទៃ
នៅពេលដែលអ្នកស្លូត ស្មោះត្រង់ពេក ហើយប្រសិនបើរាប់អានចំមនុស្សខុសទៀត អ្នកអាចនឹងត្រូវគេប្រើអំណាចគាបសង្កត់មកលើដោយមិនដឹងខ្លួន។
៧. អ្នកមានអារម្មណ៍ថាធុញថប់នឹងអ្វីៗគ្រប់យ៉ាង
អ្នកមានកាតព្វកិច្ចជាច្រើនដែលត្រូវបំពេញដែលនាំឲ្យអ្នកមានអារម្មណ៍ថាស្មុគស្មាញយ៉ាងខ្លាំង ចង់បោះបង់រាល់ភារកិច្ចនិងគោលបំណងរបស់អ្នកចោល។
ដូចនេះ ប្រសិនបើអ្នកសង្កេតឃើញថាអ្នកមានបង្ហាញសញ្ញាទាំង៧នេះ គប្បីហាត់ពុតអារម្មណ៍អ្នកឲ្យមកគិតបែបវិជ្ជមាន ព្យាយាមស្រលាញ់ខ្លួនឯងឲ្យបានច្រើននិងកុំភ្លេចប្រើពេលដើម្បីសម្រាកផង៕
ប្រភព៖ បរទេស
អំពីអ្នកសរសេររបស់យើង៖ Nuth
Tel:
ព័ត៌មានថ្មីៗ
